ចិនស​ន្យាពង្រឹង​កិច្ចសហប្រ​តិបត្តិការសេ​ដ្ឋកិច្ច​និងពាណិជ្ជកម្មរវាងប្រទេស​​ទាំងពីរឲ្យកាន់​តែប្រសើរ

 លោកShohrat Zakirអនុប្រធានគណៈកម្មាធិកា​អចិន្ត្រៃយ៍នៃសភាតំណាង​ប្រជាជ​ន​ចិនបានប្រកាសធ្វើការជិតស្និទ្ធជាមួយ​សភា​កម្ពុជាក៏ដូចជាមន្ត្រីរដ្ឋាភិបាលប្រទេសទាំងពីរដើម្បីរួមចំណែកជំរុញកិច្ចសហប្រតិបត្តិការផ្នែកសេដ្ឋកិច្ចនិងពាណិជ្ជកម្មប្រទេសទាំងពីរឱ្យកាន់តែល្អប្រសើរស្របតាមស្មារតីនៃចំណងទំនាក់ទំនងដ៏ស៊ីជម្រៅនៃប្រទេសទាំងពីរ។

មន្ត្រីជាន់ខ្ពស់សភាប្រជាជនចិនបានគូសរំលេចបែបនេះក្នុងពេលដឹកនាំគណៈប្រតិភូជួបសម្តែងការគួរសមនិងពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅរសៀលថ្ងៃពុធ ទី២២ ខែឧសភា ឆ្នាំ២០២៤នេះ នៅវិមានសន្តិភាព។ក្នុងជំនួបនោះ លោកShohrat Zakir ជម្រាបសម្តេចធិបតីពីការកត់សម្គាល់​ របស់​លោក​ពេលទស្សនកិច្ចនៅកម្ពុជា គឺបានមើលឃើញថាកម្ពុជាជាពិសេសរាជធានីភ្នំពេញមានការអភិវឌ្ឍរីកចម្រើនយ៉ាងឆាប់រហ័ស និងមានភាពស្រស់ស្អាត។​លោកបានជម្រាប​សម្តេចធិបតីអំពីលទ្ធផលនៃជំនួបប្រកបដោយផ្លែផ្កាជាមួយសម្តេចមហារដ្ឋសភាធិការធិបតីឃួនសុដារីដែលជាផ្នែកនៃការពង្រឹងនិងពង្រីកកិច្ចសហប្រតិបត្តិការ​នៃប្រទេស​ទាំងពីរ។ បន្ថែមពីលើនេះ លោកShohrat Zakirក៏បានបញ្ជាក់ថាចិន-កម្ពុជាគឺជា​មិត្ដ​ដ៏ជិតស្និទ្ធមិត្តពិតប្រាកដនិងទុកចិត្តគ្នា ហើយតាមរយៈការពង្រឹងទំនាក់ទំនងនិងកិច្ចសហប្រតិបត្តិការជាបន្តបន្ទាប់រវាងថ្នាក់ដឹកនាំនៃប្រទេសទាំងពីរចំណងមិត្តភាព​រវាង​ប្រទេសទាំងពីរ បានប្រែក្លាយទៅជាមិត្តដែកថែបដែលមិនអាចបំបែកបាន និង​កាន់​តែជំរុញកិច្ចសហប្រតិបត្តិការ នៃការកសាងសហគមន៍វាសនារួមចិន-កម្ពុជា ក្នុង​យុគសម័យថ្មី ឱ្យលេចចេញជារូបរាង និងមានដំណើរការកាន់តែរឹងមាំ ប្រកបដោយ​គុណភាពកម្រិតនិងស្ដង់ដារខ្ពស់ផងដែរ។លោកShohrat Zakirបានបញ្ជាក់ថា “ដំណើរ​ទស្សនកិច្ច​របស់​លោក នៅកម្ពុជានាពេលនេះ ធ្វើឡើងដើម្បីរួមចំណែកជំរុញទំនាក់ទំនង និងកិច្ចសហប្រតិ​បត្តិការរវាងប្រទេសទាំងពីរឱ្យកាន់តែរឹងមាំបន្ថែមទៀត”។សម្តេចធិបតី បានសម្តែងការស្វាគមន៍ចំពោះលោកShohrat Zakirនិងគណៈប្រតិភូ ដែលបានអញ្ជើញមកបំពេ​ញទស្សនកិច្ចនៅកម្ពុជា ព្រមទាំងបានថ្លែង​អំណរគុណ និងវាយតម្លៃខ្ពស់ ចំពោះលទ្ធផលប្រកបដោយផ្លែផ្កា នៃកិច្ចពិភាក្សា​រវាង​សម្តេចមហារដ្ឋសភាធិការធិបតី និងលោកShohrat Zakir ក្នុងការបន្តពង្រឹង និង​ពង្រីកកិច្ចសហប្រតិបត្តិការ វាងស្ថាប័ននីតិប្បញ្ញត្តិនៃប្រ​ទេសទាំងពីរ។សម្តេចធិបតីបានបញ្ជាក់ដែរថា ក្នុងទំនាក់ទំនងរវាងកម្ពុជា-ចិន រយៈពេលជិត​​៧០ឆ្នាំ ប្រទេសទាំងពីរបានពង្រឹង និងពង្រីកទំនាក់ទំនងក្លាយ​ជាមិត្ត​ដែកថែប ព្រម​ទាំ​ង​បានពង្រឹង និងពង្រីកកិច្ចសហប្រតិបត្តិការលើគ្រប់វិស័យ។សម្តេចធិបតី បានថ្លែង​អំណរគុណរដ្ឋាភិបាល និងប្រជាជនចិន ដែលបានរួមចំណែក​ ក្នុងការជំរុញការអភិវឌ្ឍសង្គម -សេដ្ឋកិច្ចកម្ពុជា ឱ្យមានការរីកចម្រើន ហើយរាជរដ្ឋា​ភិ​បាល​នីតិកាលទី៧ នៃរដ្ឋសភា នឹងបន្តការពង្រឹង និងពង្រីកកិច្ចសហប្រតិបត្តិការរវាង​ប្រទេសទាំងពីរឱ្យកាន់តែរឹងមាំបន្ថែមទៀត៕