លោ​កKi​m Jong-unអាច​នឹង​​ធ្វើ​ទស្សនកិច្ច​នៅ​រុស្ស៊ី​​នៅ​សប្តាហ៍​​ក្រោយ

 ប្រភពពីសហរដ្ឋអាមេរិកនិងសម្ព័ន្ធមិត្តបាននិយាយថាមេដឹកនាំកូរ៉េខាងជើង លោកKim Jong-unអាចនឹងទៅបំពេញទស្សនកិច្ចនៅប្រទេសរុស្ស៊ី និងជួបពិភាក្សាជាមួយប្រធានាធិបតីVladimir Putin នៅដើមសប្តាហ៍ក្រោយ។កាសែត New York Times ដោយដកស្រង់ប្រភពពីសហរដ្ឋអាមេរិកនិងសម្ព័ន្ធមិត្ត បាននិយាយថា មេដឹកនាំកូរ៉េខាងជើង លោកKim Jong-unអាចចាកចេញពីទីក្រុងព្យុងយ៉ាងដោយរថភ្លើងទៅកាន់ទីក្រុង Vladivostok របស់រុស្ស៊ី ហើយជួបពិភាក្សាជាមួយប្រធានាធិបតី Putin ។

ប្រធានាធិបតីរុស្ស៊ី លោកVladimir Putin  (ស្តាំ) និងមេដឹកនាំកូរ៉េខាងជើង លោកKim Jong-un  នៅទីក្រុង Vladivostok ក្នុងខែមេសា ឆ្នាំ ២០១៩។ រូបថត៖ KCNA

យោងតាមប្រភពនេះដំណើរទស្សនកិច្ចនេះមានគោលបំណងពង្រឹងទំនាក់ទំនងរវាងរុស្ស៊ីនិងកូរ៉េខាងជើងបន្ថែមទៀត។ដំណឹងនេះកើតឡើងចំពេលមានការរំពឹងទុកថាមេដឹកនាំទាំង២នឹងពិភាក្សាអំពីការផ្គត់ផ្គង់សម្ភារៈយោធារបស់ទីក្រុងព្យុងយ៉ាងដល់ទីក្រុងម៉ូស្គូជាថ្នូរនឹងការចែករំលែកបច្ចេកវិទ្យារបស់ទីក្រុងម៉ូស្គូ ដើម្បីអភិវឌ្ឍផ្កាយរណបនិងនាវាមុជទឹកនុយក្លេអ៊ែរ។រុស្ស៊ី និង​កូរ៉េ​ខាង​ជើង​មិន​ទាន់​ធ្វើ​អត្ថាធិប្បាយ​នៅ​ឡើយ​ទេ។សហរដ្ឋ​អាមេរិក និង​សម្ព័ន្ធមិត្ត​មាន​ការ​ព្រួយ​បារម្ភ​ជា​យូរ​មក​ហើយ​ថា កូរ៉េ​ខាង​ជើង​កំពុង​ផ្ទេរ​សព្វាវុធ​ទៅ​ឲ្យ​រុស្ស៊ី​ចំពេល​មាន​អរិភាព​អូសបន្លាយ​ក្នុង​ប្រទេស​អ៊ុយក្រែន។ ទោះ​ជា​យ៉ាង​ណា ទីក្រុង​ព្យុងយ៉ាង និង​ក្រុង​ម៉ូស្គូ​បាន​បដិសេធ។កូរ៉េខាងជើង​កំពុង​ជំរុញ​ទំនាក់ទំនង​សហប្រតិបត្តិការ​ជាមួយ​រុស្ស៊ី។ នៅក្នុងសារមួយទៅកាន់លោក Putin ក្នុងឱកាសនៃទិវាជាតិរបស់រុស្ស៊ី លោកKim Jong-unបានហៅទំនាក់ទំនងរវាងប្រទេសទាំង២ថាជា “ទ្រព្យសម្បត្តិយុទ្ធសាស្ត្រ”ហើយទីក្រុងព្យុងយ៉ាងនឹងមិនឈប់ដំណើរការដើម្បីដាំដុះវាឡើយ។លោក Kim ក៏បានការពារការសម្រេចចិត្តរបស់លោក  Putin ដើម្បីធ្វើ "ប្រតិបត្តិការយោធាពិសេស" នៅក្នុងប្រទេសអ៊ុយក្រែន។ យោង​តាម​មេដឹកនាំ​កូរ៉េ​ខាងជើង សង្គ្រាម​នៅ​អ៊ុយ​ក្រែ​ន​បាន​ឈាន​ចូល​ដល់ «​ដំណាក់កាល​ថ្មី​ដែល​សម្រេចចិត្ត​»៕ប្រភពReuters