អតីត​​នាយ​ក​រដ្ឋមន្ត្រី​ថៃ​បាន​ចំណា​យ​ប្រាក់​ដើម្បី​ឲ្យ​មាន​ការ​​ដោះលែង​ឲ្យ​នៅ​​ក្រៅ​ឃុំ

 តុលាការព្រហ្មទណ្ឌថៃនៅថ្ងៃនេះ(១៨មិថុនា)បានអនុញ្ញាតឲ្យអតីតនាយករដ្ឋមន្ត្រីThaksinShinawatraដោះលែងឲ្យនៅក្រៅឃុំបន្ទាប់ពីបានបង់ប្រាក់ធានាចំនួនកន្លះលានបាតប្រហែល១៣.៦០០ដុល្លារ។

យោងតាមកាសែត BangkokPostលោកThaksinត្រូវបានចោទប្រកាន់ពីបទប្រមាថព្រះមហាក្សត្រនិងឧក្រិដ្ឋកម្មកុំព្យូទ័រពាក់ព័ន្ធនឹងការអត្ថាធិប្បាយដែលបានធ្វើឡើងនៅក្នុងបទសម្ភាសន៍មួយកាលពីឆ្នាំ២០១៥។យោងតាមអ្នកនាំពាក្យការិយាល័យអគ្គមេធាវី (OAG) លោក Prayut Phetcharakhun នៅព្រឹកនេះ លោកThaksin បានបង្ហាញខ្លួននៅចំពោះមុខព្រះរាជអាជ្ញា ហើយត្រូវបាននាំខ្លួនទៅកាន់តុលាការព្រហ្មទណ្ឌដើម្បីបង្ហាញមុខក្នុងសវនាការ ដើម្បីចោទប្រកាន់លោកពីបទប្រមាថព្រះមហាក្សត្រ។ លោក Prayutបាននិយាយថាតុលាការបានទទួលយកសំណុំរឿងនៅម៉ោង ៨និង៥៦ នាទីព្រឹក ដោយប្រកាសជាផ្លូវការថាលោកThaksin ជាចុងចោទ។អតីតនាយករដ្ឋមន្ត្រីThaksinបានបដិសេធរាល់ការចោទប្រកាន់ ហើយបាននិយាយថាលោកនឹងការពារខ្លួននៅក្នុងតុលាការ។យោងតាមតុលាការ ចុងចោទត្រូវប្រគល់លិខិតឆ្លងដែនរបស់ខ្លួន ហើយត្រូវបានហាមឃាត់មិនឱ្យចាកចេញពីប្រទេសលុះត្រាតែមានការអនុញ្ញាត។ តុលាការ​បាន​អនុញ្ញាត​ឲ្យ​លោកThaksin នៅ​ក្រៅ​ឃុំ​ក្រោម​ហេតុផល​ថាអតីត​មេដឹកនាំ​រូប​នេះ​មិន​រត់​គេច​ខ្លួនរំខាន​ភស្តុតាង ប្រព្រឹត្ត​អំពើ​គ្រោះថ្នាក់ឬ​រារាំង​ដំណើរការ​របស់​តុលាការ។កាល​ពី​ចុង​ខែ​មុន ការិយាល័យ​អគ្គ​មេធាវី​បាន​ប្រកាស​ពី​ការ​សម្រេច​ចិត្ត​កាត់​ទោសលោកThaksin។ការកាត់ទោសដំបូងត្រូវបានរំពឹងថានឹងធ្វើឡើងមុននេះ។ប៉ុន្តែត្រូវបានពន្យារពេលរហូតដល់ថ្ងៃនេះដោយសារតែលោកថាក់ស៊ីនបានឆ្លង Covid-19។អតីតនាយករដ្ឋមន្ត្រីThaksin អាយុ៧៤ឆ្នាំ ត្រូវបានចោទប្រកាន់ពីបទបរិហារកេរ្តិ៍ក្នុងបទសម្ភាសន៍ជាមួយកាសែតកូរ៉េ Chosun Ilbo កាលពីថ្ងៃទី២១ឧសភា២០១៥។ នៅក្នុងបទសម្ភាសន៍ លោកបានអះអាងថាក្រុមប្រឹក្សាឯកជនបានគាំទ្ររដ្ឋប្រហារឆ្នាំ២០១៤ដែលបានផ្ដួលរំលំរដ្ឋាភិបាលរបស់ប្អូនស្រីរបស់លោក លោកស្រី Yingluck Shinawatra។ការ​ត្អូញត្អែរ​ដំបូង​អំពី​បទ​សម្ភាសន៍​នេះ​ត្រូវ​បាន​ធ្វើ​ឡើង​ដោយ​ឧត្តម​សេនីយ៍ Udomdej Sitabutr ដែល​កាល​នោះ​ជា​អនុរដ្ឋមន្ត្រី​ការពារ​ជាតិ​ក្នុង​រដ្ឋាភិបាល​យោធា​របស់​ឧត្តម​សេនីយ៍ Prayut Chan-o-cha។ឧត្តមសេនីយ៍ណែនាំឲ្យអគ្គព្រះរាជអាជ្ញារងចាត់វិធានការតាមផ្លូវច្បាប់ចំពោះលោក Thaksin ដែលនាំឲ្យ OAG ដាក់ពាក្យប្តឹង។ នៅឆ្នាំ២០១៥ តុលាការព្រហ្មទណ្ឌបានទទួលយកសំណុំរឿងនេះទៅជំនុំជម្រះ ហើយបានចេញដីកាចាប់ខ្លួនលោកថាក់ស៊ីនThaksin ដែលរស់នៅនិរទេសខ្លួននៅបរទេសហើយមិនបានត្រឡប់ទៅប្រទេសថៃវិញរហូតដល់ខែសីហា ឆ្នាំ២០២៣។ប៉ូលីសបានចោទប្រកាន់ការអត្ថាធិប្បាយដែលលោកThaksin បានធ្វើឡើងក្នុងពេលសម្ភាសន៍បានបំពានលើមាត្រា១១២នៃក្រមព្រហ្មទណ្ឌ ដែលត្រូវបានគេស្គាល់ថាជាច្បាប់ប្រមាថព្រះមហាក្សត្រ ក៏ដូចជាច្បាប់ស្តីពីឧក្រិដ្ឋកម្មកុំព្យូទ័រផងដែរ។កន្លងមក អ្នកនាំពាក្យរបស់ OAG បាននិយាយថា អគ្គមេធាវី Amnat Chetcharoenrakបានសម្រេចកាត់ទោសលោកThaksin លើបទចោទប្រកាន់ទាំងពីរ តាមសំណើរបស់ប៉ូលីស។ការចោទប្រកាន់ពីបទឧក្រិដ្ឋកម្មកុំព្យូទ័រគឺពាក់ព័ន្ធនឹងលោកThaksin បញ្ចូលព័ត៌មានទៅក្នុងប្រព័ន្ធកុំព្យូទ័រដែលជាសកម្មភាពចាត់ទុកថាជាការគំរាមកំហែងដល់សន្តិសុខជាតិ។ច្បាប់​ស្តី​ពី​ការ​ប្រមាថ​ព្រះមហាក្សត្រ​មាន​ទោស​ជាប់​ពន្ធនាគារ​អតិបរមា​រហូត​ដល់​១៥​ឆ្នាំ​សម្រាប់​រាល់​ទង្វើ​ប្រមាថ​ព្រះរាជវង្សានុវង្ស៕ពុតសាម៉ាត់