តើ​ជ​ម្លោះ​​អ៊ីស្រាអ៊ែល-ហេ​​សបូឡា​នឹង​កើ​​ន​ឡើង​នឹង​​​នាំ​ឱ្យ​មាន​សង្គ្រាម​​សរុប​ឬ?

 ជម្លោះអ៊ីស្រាអែល-ហេសបូឡា ហាក់ដូចជាឈានដល់កម្រិតកំពូលបន្ទាប់ពីការស្លាប់របស់មេទ័ពជាន់ខ្ពស់ ហេសបូឡាកាលពីថ្ងៃទី១១ខែមិថុនា។ទោះយ៉ាងណាក៏ដោយ ប្រូបាប៊ីលីតេនៃសង្រ្គាមពេញលក្ខណៈគឺទាបណាស់។គិតត្រឹមថ្ងៃទី១៣ខែមិថុនាកងកម្លាំងហេសបូឡាអ៊ីស្លាមនៅលីបង់បានបាញ់រ៉ុក្កែតចំនួន២១៥គ្រាប់ទៅកាន់ភាគខាងជើងអ៊ីស្រាអែលដើម្បីសងសឹកចំពោះការស្លាប់របស់មេបញ្ជាការជាន់ខ្ពស់ Taleb Abdallah នៅល្ងាចថ្ងៃទី ១១ខែមិថុនា។

សមាជិកនៃកងកម្លាំងហេសបូឡាចូលរួមពិធីបុណ្យសពរបស់មេបញ្ជាការជាន់ខ្ពស់Taleb Abdallah នៅថ្ងៃទី១២ខែមិថុនា។រូបថត REUTERS

ប្រភពសន្តិសុខអនាមិកពីទីភ្នាក់ងារព័ត៌មាន Reuters បានបង្ហើបថា លោក Taleb Abdallah គឺជាមេបញ្ជាការក្រុម ហេសបូឡា ជាន់ខ្ពស់បំផុតដែលត្រូវបានសម្លាប់ក្នុងរយៈពេល៨ខែចុងក្រោយនេះ ហើយការវាយប្រហារតាមអាកាសនេះក៏ជាការវាយប្រហារដ៏ធំបំផុតមួយរបស់ហេសបូឡា ដែលផ្តោតលើអ៊ីស្រាអែលចាប់តាំងពីខែតុលាឆ្នាំ២០២៣ ។នៅថ្ងៃដដែលនោះ ថ្ងៃទី១៣ខែមិថុនា ក្រុមហេសបូឡា បានប្រកាសថា ខ្លួនបានបើក "ការវាយប្រហារដោយគ្រាប់រ៉ុក្កែត និងយន្តហោះគ្មានមនុស្សបើកសំដៅលើបន្ទាយចំនួន៦និងទីតាំងយោធា" និងបានដាក់ពង្រាយ"ក្រុមយន្តហោះគ្មានមនុស្សបើកផ្ទុកគ្រឿងផ្ទុះ" សំដៅលើមូលដ្ឋានទ័ពអ៊ីស្រាអែលចំនួន៣ផ្សេងទៀត។វាពិបាកណាស់ក្នុងការមានសង្រ្គាមសរុបទោះបីជាជម្លោះនៅតាមព្រំដែនអ៊ីស្រាអែល និងលីបង់កំពុងកើនឡើងក៏ដោយ អ្នកសង្កេតការណ៍អន្តរជាតិជឿថា សេណារីយ៉ូនៃសង្រ្គាមសរុបរវាងអ៊ីស្រាអែលនិងក្រុមហេសបូឡាមានកម្រិតទាបក្នុងបរិបទនៃកិច្ចខិតខំប្រឹងប្រែងរបស់ទីក្រុងវ៉ាស៊ីនតោន ដើម្បីគ្រប់គ្រងស្ថានការណ៍។ម្យ៉ាង​ទៀតលទ្ធភាព​នៃ​សង្គ្រាម​ទ្រង់ទ្រាយ​ធំ​នៅ​លើ​ជួរ​មុខ​អ៊ីស្រាអែល-លីបង់ពិតជា​មិន​ទំនង​ទេ។ដោយចែករំលែកជាមួយទស្សនាវដ្ដី Responsible Statecraft មន្ត្រី ហេសបូឡា ដែលសុំមិនបញ្ចេញឈ្មោះ បានបង្ហើបថា សេចក្តីថ្លែងការណ៍ថ្មីៗរបស់អ៊ីស្រាអែលកាន់តែគំរាមកំហែង ជំនួសឱ្យការផ្លាស់ប្តូរយុទ្ធសាស្ត្រយ៉ាងពិតប្រាកដក្នុងទិសដៅពង្រីកទំហំ ដ៏សម្បើមនៃប្រតិបត្តិការយោធាប្រឆាំងនឹងហេសបូឡា។មន្ត្រី​រូប​នេះ​បាន​និយាយ​ថា​៖ «​តាម​ពិតលទ្ធភាព​នៃ​សង្គ្រាម​ទាំង​អស់​មិន​មាន​ការ​កើន​ឡើង​ទេ​។ចាប់តាំងពីជម្លោះអ៊ីស្រាអែលនិងក្រុមហាម៉ាស់បានផ្ទុះឡើងក្នុងខែតុលាឆ្នាំ២០២៣កងកម្លាំងហេសបូឡាដែលមានមូលដ្ឋាននៅប្រទេសលីបង់ក៏បានបើកសមរភូមិប្រយុទ្ធជាទៀងទាត់ជាមួយទីក្រុងTel Aviv នៅព្រំដែនភាគខាងជើងនៃប្រទេសអ៊ីស្រាអែល។គួរកត់សម្គាល់ថា ទាំងអ៊ីស្រាអែលនិងក្រុមហេសបូឡាបានកំណត់ការវាយប្រហាររបស់ពួកគេចំពោះគោលដៅយោធានៅជិតតំបន់ព្រំដែននៃប្រទេសអ៊ីស្រាអែល និងលីបង់។យោងតាមទស្សនាវដ្ដី Foreign Policy ទាំងក្រុមហេសបូឡា និងអ៊ីស្រាអែលដឹងថាសង្គ្រាមទ្រង់ទ្រាយធំណាមួយរវាងប្រទេសទាំងពីរនឹងមានការបំផ្លិចបំផ្លាញមិនគួរឱ្យជឿ។ដូច្នេះទំនង​ជា​ប្រទេស​ទាំង​ពីរ​នឹង​ចាត់​វិធាន​ការ​ដើម្បី​គ្រប់​គ្រង​ការ​កើន​ឡើង​នៃ​ភាព​តាន​តឹង​ក្រោម​កម្រិត​នៃ​សង្គ្រាម​ដ៏ធំ។នេះមានន័យថាកម្រិតនៃការកើនឡើងនៃភាពតានតឹងនៅក្នុងរយៈពេលខាងមុខអាចកើនឡើងឬថយចុះ ជាមួយនឹងវិសាលភាព និងទំហំកាន់តែទូលំទូលាយ។ប៉ុន្តែនឹងមិនហួសពីគោលដៅយោធានោះទេ។អ្វី​ដែល​ហួស​ពី​គោលដៅ​ខាង​លើ​អាច​បង្ក​ឱ្យ​មាន​សង្គ្រាម​ដែល​មាន​ផលវិបាក​រាលដាល​ហួស​ព្រំដែន​នៃ​ប្រទេស​លីបង់និង​អ៊ីស្រាអែល។នាយករដ្ឋមន្ត្រីអ៊ីស្រាអែលលោក Benjamin Netanyahu បច្ចុប្បន្នទំនងជានឹងបន្តអូសបន្លាយជម្លោះនៅតំបន់ហ្គាហ្សាស្ទ្រីប យ៉ាងហោចណាស់រហូតដល់ការបោះឆ្នោតនៅសហរដ្ឋអាមេរិកដែលនឹងប្រព្រឹត្តទៅនៅខែវិច្ឆិកាឆ្នាំនេះ។ទោះជាយ៉ាងណាក៏ដោយ គ្មានអ្វីបង្ហាញថាលោកNetanyahuនឹងចាប់ផ្តើមសង្រ្គាមទាំងស្រុងនៅក្នុងប្រទេសលីបង់នាពេលខាងមុខនោះទេ។អ៊ីស្រាអែល​អាច​ដាក់​ពង្រាយ​ការ​វាយប្រហារ​តាម​អាកាស​ដើម្បី​ដាក់​សម្ពាធ​លើ​ក្រុម​ហេសបូឡា។ ផ្ទុយទៅវិញក្រុមហេសបូឡានឹងបន្តឆ្លើយតបទៅនឹងសកម្មភាពឈ្លានពានរបស់អ៊ីស្រាអែលជាមួយនឹងវិធានការស្រដៀងគ្នានេះក្នុងគោលបំណងរារាំង។ប៉ុន្តែវាច្បាស់ណាស់ថាសម្រាប់ពេលនេះការគំរាមកំហែងនៃសង្គ្រាមនៅតែជាចលនាយុទ្ធសាស្ត្រជាជាងការពិតដែលជិតមកដល់។

ការព្រួយបារម្ភពីវ៉ាស៊ីនតោន

ចំណែក​ក្រុង​វ៉ាស៊ីនតោនរដ្ឋបាល​លោកBidenកំពុង​ព្យាយាម​ទប់ស្កាត់​សង្គ្រាម​ទ្រង់ទ្រាយ​ធំ​លើ​ជួរមុខ​លីបង់និង​អ៊ីស្រាអែល។ប្រព័ន្ធផ្សព្វផ្សាយលីបង់បាននិយាយថាមន្ត្រីជាន់ខ្ពស់អាមេរិកមួយចំនួនរួមទាំងបេសកជនពិសេសរបស់ប្រធានាធិបតីអាមេរិក លោក Amos Hochsteinត្រូវបានគេនិយាយថាបានចូលរួមកិច្ចប្រជុំកម្រិតខ្ពស់ដើម្បីស្វែងរកដំណោះស្រាយដោយសន្តិវិធី និងជៀសវាងជម្លោះកើនឡើង។មន្ត្រីអាមេរិកក៏បានព្រមានអ៊ីស្រាអែលថាការវាយប្រហារនាពេលថ្មីៗនេះអាចបង្កឱ្យមានសង្គ្រាមក្នុងតំបន់ដោយអូសទាញនៅក្នុងប្រទេសអ៊ីរ៉ង់ ស៊ីរី និងសម្ព័ន្ធមិត្តនៅយេម៉ែននិងអ៊ីរ៉ាក់។មន្ត្រី​អាមេរិក​អនាមិក​ម្នាក់​បាន​និយាយ​ថា​៖«​ជនជាតិ​អាមេរិក​ដឹង​ថា​សង្គ្រាម​កាន់តែ​ធំ​នៅ​ជួរ​មុខ​លីបង់​នឹង​មាន​ន័យ​ថា​ជា​សង្គ្រាម​ក្នុង​តំបន់​»។រហូត​មក​ដល់​ពេល​នេះ ក្រុម​ហេសបូឡា​គ្មាន​ជម្រើស​អ្វី​ក្រៅ​ពី​ចូល​រួម​ក្នុង​ជម្លោះ​កម្រិត​ទាប​នៅ​តាម​ព្រំដែន​លីបង់ និង​អ៊ីស្រាអែល។ក្រុមអ្នកសង្កេតការណ៍អន្តរជាតិនិយាយថា ការគណនារបស់ហេសបូឡា អំពីការបើករណសិរ្សជាមួយអ៊ីស្រាអែល មានទំនាក់ទំនងយ៉ាងជិតស្និទ្ធទៅនឹងស្ថានភាពសង្រ្គាមនៅតំបន់ហ្គាហ្សាស្ទ្រីប៕ពុតសាម៉ាត់