លោ​​កPutinនិ​ង​លោកKim​ Jong-un​បាន​ផ្តល់​កាំភ្លើងដល់គ្នា​ទៅវិ​ញទៅ​មក

 វិមានក្រឹមឡាំងបានបញ្ជាក់ថា ប្រធានាធិបតីរុស្ស៊ី លោកVladimir Putinនិងមេដឹកនាំកូរ៉េខាងជើង លោកKim Jong-un បានផ្តល់កាំភ្លើងដល់គ្នាទៅវិញទៅមកក្នុងអំឡុងកិច្ចប្រជុំរបស់ពួកគេ នៅចុងបូព៌ា។អ្នកនាំពាក្យវិមានក្រឹមឡាំង លោក Dmitry Peskov បាននិយាយក្នុងបទសម្ភាសន៍ថា"ប្រធានាធិបតី Putinបានផ្តល់ឱ្យលោកប្រធានKim Jong-un នូវកាំភ្លើងដែលមានគុណភាពខ្ពស់បំផុតផលិតដោយប្រទេសរុស្ស៊ី។ 

ប្រធានាធិបតីរុស្ស៊ី លោកPutin (ស្តាំ) និងមេដឹកនាំកូរ៉េខាងជើង លោក Kim Jong-un នៅឯកំពង់ផែ Vostochny Cosmodrome ដែលជាយានអវកាសទំនើបបំផុតរបស់រុស្ស៊ី នៅថ្ងៃទី ១៣ ខែកញ្ញា។ រូបថត៖ KCNA

លោកប្រធានាធិបតីក៏ទទួលបានកាំភ្លើងដែលផលិតដោយកូរ៉េខាងជើងផងដែរ" ។លោកPutinក៏បានឲ្យលោកKim «ស្រោមដៃពីយានអវកាស ដែលធ្លាប់ប្រើច្រើនដងក្នុងលំហ»។អ្នកនាំពាក្យវិមានក្រឹមឡាំងក៏បានបញ្ជាក់ដែរថាប្រធានាធិបតីរុស្ស៊ីបានទទួលការអញ្ជើញទៅបំពេញទស្សនកិច្ចនៅកូរ៉េខាងជើងពីលោកKim។ ប៉ុន្តែមិនបានបញ្ជាក់ពីពេលវេលានោះទេ។ លោកPutinបានត្រឡប់ទៅទីក្រុងម៉ូស្គូវិញបន្ទាប់ពីបានជួបលោកKimនៅចុងបូព៌ា។លោក Peskov បាននិយាយថា "កិច្ចប្រជុំកំពូលរវាងមេដឹកនាំនៃប្រទេសទាំង២គឺទាន់ពេលវេលា មានប្រយោជន៍និងស្ថាបនា។រុស្ស៊ីនឹងបន្តអភិវឌ្ឍទំនាក់ទំនងជាមួយកូរ៉េខាងជើង" ដោយលោកបានបន្ថែមថា លោក Kim Jong-un បន្តទៅបំពេញទស្សនកិច្ចនៅប្រទេសរុស្ស៊ីនៅប៉ុន្មានថ្ងៃខាងមុខនេះ។លោកបានបន្ថែមថា "កូរ៉េខាងជើងគឺជាអ្នកជិតខាងរបស់យើង និងដូចប្រទេសជិតខាងដទៃទៀតដែរ។រុស្ស៊ីមានបំណងកសាង និងអភិវឌ្ឍទំនាក់ទំនងល្អនិងកិច្ចសហប្រតិបត្តិការដែលមានផលប្រយោជន៍ទៅវិញទៅមក ដោយផ្អែកលើការគោរពគ្នាទៅវិញទៅមក" ។អ្នកនាំពាក្យវិមានក្រឹមឡាំងបាននិយាយថារដ្ឋមន្ត្រីការបរទេសលោក Sergey Lavrov នឹងធ្វើទស្សនកិច្ចនៅកូរ៉េខាងជើងក្នុងខែតុលា។ នៅពេលសួរថាតើរុស្ស៊ីនឹងដកទណ្ឌកម្មប្រឆាំងនឹងកូរ៉េខាងជើងដែរឬទេ លោកPeskovបាននិយាយថារុស្ស៊ីនៅតែជាសមាជិកទទួលខុសត្រូវនៃក្រុមប្រឹក្សាសន្តិសុខអង្គការសហប្រជាជាតិ។កាលពីថ្ងៃទី១២ ខែកញ្ញា មេដឹកនាំកូរ៉េខាងជើងបានមកដល់រុស្ស៊ីតាមរថភ្លើងតាមការអញ្ជើញរបស់ប្រធានាធិបតីPutin។ នេះ​ជា​ដំណើរ​ទៅ​ក្រៅ​ប្រទេស​លើក​ដំបូង​របស់​លោក​ Kim  តាំង​ពី​ឆ្នាំ​២០១៩​មក។ប្រធានាធិបតីរុស្ស៊ីបានសរសើរ "ការពង្រឹងកិច្ចសហប្រតិបត្តិការ និងមិត្តភាពរវាងប្រទេសទាំង២" នៅពេលទទួលស្វាគមន៍លោក Kim នៅកំពង់ផែអវកាសនៅ Far East កាលពីថ្ងៃទី១៣ខែកញ្ញា។ មេដឹកនាំកូរ៉េខាងជើងបានប្រាប់លោកPutinថា រុស្ស៊ីប្រាកដជានឹងឈ្នះ "ជ័យជំនះដ៏ខ្លាំង" លើគូប្រជែងរបស់ខ្លួន។ប្រធានាធិបតីរុស្ស៊ីបានលើកឡើងពីលទ្ធភាពនៃកិច្ចសហប្រតិបត្តិការបច្ចេកទេសយោធាជាមួយកូរ៉េខាងជើងខណៈពេលដែលនៅតែគោរពយ៉ាងពេញលេញជាមួយនឹងការរឹតបន្តឹងអន្តរជាតិ។ អ្នកនាំពាក្យវិមានក្រឹមឡាំងក៏បាននិយាយផងដែរថា រុស្ស៊ី និងកូរ៉េខាងជើងមានសក្តានុពលសម្រាប់កិច្ចសហប្រតិបត្តិការក្នុងលំហ៕ប្រភព AFP, Reuters

ប្រធានាធិបតីPutin និងរដ្ឋមន្ត្រីការពារជាតិរុស្ស៊ី លោក Sergei Shoigu បានត្រួតពិនិត្យកាំភ្លើងកាលពីខែធ្នូ ឆ្នាំ២០២១។ រូបថត៖Reuters