ព្រះមហាក្សត្រមា​​នជំនឿយ៉ាងមុតមាំ​ថា​រា​ជរដ្ឋា​ភិបាលកម្ពុជា​អា​ណត្តិថ្មីនឹងបន្តជំ​រុញកំណើ​ន​សេដ្ឋកិច្ច

 ព្រះករុណាព្រះបាទសម្តេចព្រះបរមនាថ នរោត្តម សីហមុនីព្រះមហាក្សត្រ នៃព្រះរាជា​ណាចក្រកម្ពុជាមានជំនឿយ៉ាងមុតមាំថារាជរដ្ឋាភិបាលកម្ពុជាអាណត្តិថ្មីដែលនឹងទទួល​ការទុកចិត្តពីរដ្ឋសភានឹងបំពេញភារកិច្ចតាមគោលនយោបាយ បន្តជំរុញកំណើនសេដ្ឋកិច្ច លើកកម្ពស់កម្រិត ជីវភាពប្រជាពលរដ្ឋ បន្តអភិវឌ្ឍន៍ និងពង្រឹងប្រព័ន្ធការពារសង្គម ដែល​មានវិសាលភាពគ្របដណ្តប់ប្រជាពលរដ្ឋគ្រប់រូបទាំងការអភិរក្ស​និងអភិវឌ្ឍន៍​វប្បធម៌​ដោយ​ចីរភាព ដើម្បីធានាអត្ថិភាពដ៏រឹងមាំនៃអត្តសញ្ញាណជាតិ ជំរុញការអភិវឌ្ឍសេដ្ឋកិច្ចសង្គម ស្របគ្នានឹងការលើកកម្ពស់សីលធម៌ សម្រាប់ភាពសុខដុមនៃសង្គមជាតិ។ ព្រះករុណា​ព្រះមហាក្សត្របានមានព្រះរាជឱង្ការដូច្នេះ ក្នុងឱកាសបើក​សម័យ​ប្រជុំ​ដំបូងនៃរដ្ឋសភា នីតិកាលទី៧ នាព្រឹកថ្ងៃទី ២១ ខែសីហា ឆ្នាំ២០២៣ នៅវិមានរដ្ឋសភា។

ក្នុងឱកាសបើកសម័យប្រជុំដំបូងនៃរដ្ឋសភា នីតិកាលទី៧ នេះដែរ ព្រះមហាក្សត្រ ព្រះអង្គបាន​សម្ដែង​នូវព្រះទ័យដោយក្ដីសោមនស្សរីករាយ និងចូលរួមអបអរសាទរ ពិធី​បើកសម័យប្រជុំដំបូងនៃរដ្ឋសភានីតិកាលទី៧និងសម្តែងនូវអំណរសាទរដ៏កក់ក្តៅជូន ចំពោះ សមាជិក សមាជិការដ្ឋសភាទាំងអស់ ដែលប្រជាពលរដ្ឋបានសម្ដែងឆន្ទៈ​និងជំនឿ​ទុកចិត្ត តាមរយៈការបោះឆ្នោតជាសកលកន្លងទៅនេះ។ ព្រះអង្គមានព្រះរាជឱង្ការម្លឹកថាចាប់ពីពេលដែលរដ្ឋសភាបានចាប់បដិសន្ធិជាថ្មីនាឆ្នាំ១៩៩៣ រហូតមកដល់ពេលនេះ មាន​រយៈពេល ៣០ឆ្នាំកន្លងមកហើយ ដែលកម្ពុជាបានប្រែក្លាយពីការបែកបាក់ជាតិ និងការ​បែង​ចែកទឹកដី ទៅជាប្រទេសដែលមានសន្តិភាព ស្ថិរភាព ប្រជាធិបតេយ្យ និងអភិវឌ្ឍន៍​គ្រប់​វិស័យដែលធ្វើឱ្យប្រជាពលរដ្ឋបានរស់នៅក្រោមដំបូលសន្តិភាព ប្រកបដោយក្តី​សង្ឃឹម និងសុខក្សេមក្សាន្ត។ ព្រះករុណា ព្រះមហាក្សត្របានគូសបញ្ជាក់ថា  រដ្ឋសភា​ដែល​ជាអង្គការមាន​អំណាច​នីតិប្បញ្ញត្តិ នឹងបន្តបំពេញភារកិច្ចរបស់ខ្លួនដូចមាន កំណត់ក្នុងរដ្ឋធម្មនុញ្ញ និង​ច្បាប់ជាធរមាន ដើម្បីបន្តនិរន្តរភាពនយោបាយ សេដ្ឋកិច្ចសង្គម វប្បធម៌ កសាងព្រះរាជា​ណាចក្រកម្ពុជា ជារដ្ឋដ៏រឹងមាំ និងជឿនលឿន ដោយផ្អែកលើច្បាប់ ធានាការអនុវត្ត​ច្បាប់​ដោយស្មើភាពសម្រាប់ប្រជាពលរដ្ឋគ្រប់រូប និងធានាការពារលើកស្ទួយ សិទ្ធិសេរីភាព​គ្រប់​បែបយ៉ាងរបស់ប្រជាពលរដ្ឋ។ ព្រះអង្គបានគូសបញ្ជាក់ទៀតថា តំណាងរាស្ត្រក្នុងរដ្ឋសភា ជាតំណាងប្រជាជាតិខ្មែរទាំងមូល ធ្វើយ៉ាងណាខិតខំប្រឹង ប្រែងបន្ថែមទៀតជួយ​ប្រជាពល​រដ្ឋ​ឱ្យរស់នៅបានស្មើភាពគ្នា ក្នុងជំនឿសាសនា ការសិក្សារៀន សូត្រ ការមានការងារ​ធ្វើ​សមរម្យទៅតាមកម្លាំងសមត្ថភាព និងកម្រិតវិជ្ជារបស់ខ្លួន ។ ច្បាប់ទាំងឡាយដែលរដ្ឋ​សភា​បានអនុម័ត គឺជាឧបករណ៍គតិយុត្តិសម្រាប់រាជរដ្ឋាភិបាល អនុវត្តន៍ និងលើកកម្ពស់នីតិរដ្ឋ សំដៅឱ្យប្រទេសយើងមានក្របខ័ណ្ឌច្បាប់គ្រប់គ្រាន់ និងល្អ ស្របតាមការវិវឌ្ឍរីក​ចម្រើន​របស់សង្គមជាតិ។ ក្នុងឱកាសបើកសម័យប្រជុំដំបូងនៃរដ្ឋសភា នីតិកាលទី៧នេះដែរ   ព្រះករុណា​ជា​អម្ចាស់ជីវិតលើត្បូងបានសព្វព្រះរាជហឬទ័យ យាងជាព្រះរាជាអធិបតីភាពដ៏ខ្ពង់ខ្ពស់ ក្នុង​ព្រះរាជ​ពិធីថតរូបអនុស្សាវរីយ៍ជាមួយ បេក្ខជនជាប់ឆ្នោតជាតំណាងរាស្ត្រក្នុង​នីតិកាល​ទី៧នៃរដ្ឋសភាទាំង១២៥រូប មុនពេលព្រះអង្គស្ដេចយាងនិវត្តន៍ទៅកាន់ព្រះបរម​រាជវាំង​វិញ។បន្ទាប់ពីពិធីបើកសម័យប្រជុំដំបូងរដ្ឋសភានីតិកាលទី៧ រួចមក នៅព្រឹកថ្ងៃទី២១ ខែសីហា ឆ្នាំ២០២៣ដដែលនេះ សម្ដេចអគ្គមហាពញាចក្រី ហេង សំរិន ជាព្រឹទ្ធសមាជិក​រដ្ឋសភា ជាបេក្ខជនជាប់ឆ្នោតជាតំណាងរាស្ត្រក្នុងនីតិកាលទី៧ នៃរដ្ឋសភាដែលមាន​អាយុច្រើនជាងគេ ដោយមានបេក្ខជនជាប់ឆ្នោតជាតំណាងរាស្ត្រ ដែលមានអាយុតិចជាង​គេចំនួន៥រូបជាជំនួយការ ក៏បានបន្តដឹកនាំបើកសម័យប្រជុំរដ្ឋសភាលើកទី១ នីតិកាលទី៧ ដោយបានធ្វើការអនុម័តធ្វើការអនុម័តលើរបៀបវារៈចំនួន២ គឺទី ១ ការសម្រេចអំពី​សុពល​ភាពនៃអាណត្តិរបស់សមាជិកនីមួយៗ និងទី២-ការអនុម័តបទបញ្ជាផ្ទៃក្នុងនៃរដ្ឋសភានី​តិ​កាលទី៧។ គួរបញ្ជាក់ដែរថា  ក្នុងឱកាសបើកសម័យប្រជុំដំបូងនៃរដ្ឋសភា នីតិកាលទី៧ នា​ព្រឹក​ថ្ងៃទី ២១ ខែសីហា ឆ្នាំ២០២៣ នេះដែរ ក៏មានការយាង និងអញ្ជើញចូលរួម របស់​សម្តេចអគ្គមហាសេនាបតីតេជោ ហ៊ុន សែន  សម្តេចអគ្គមហាពញាចក្រី ហេង សំរិន សម្តេចវិបុលសេនាភក្តី សាយ ឈុំ ប្រធានព្រឹទ្ធសភា   សម្ដេចចៅហ្វាវាំង វរវៀងជ័យ អធិបតី​ស្រឹង្គារ គង់ សំអុល  សម្តេចក្រឡាហោម ស ខេង  សម្តេចពិជ័យសេនា ទៀ បាញ់  សម្ដេចកិត្តិសង្គហបណ្ឌិត ម៉ន សំអន ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និង​សមាជិក សមាជិការដ្ឋសភាអាណត្តិ ទី៧ ចំនួន១២៥រូប ព្រមទាំង ឯកឧត្តម លោក​ជំទាវ ជាឯកអគ្គរាជទូត ឯកអគ្គរដ្ឋទូត និងភ្ញៀវកិត្តិយសជាតិ និង អន្តរជាតិ ជាច្រើនរូប​ទៀត។ សម្រាប់ការបោះឆ្នោតជ្រើសតាំងតំណាងរាស្ត្រ កាលពីថ្ងៃទី២៣ ខែកក្កដា ឆ្នាំ២០២៣ ដែលមានគណបក្សនយោបាយចំនួន ១៨ បានចូលរួមប្រកួតប្រជែង មាន​តែ​គណបក្សនយោបាយចំនួន២ប៉ុណ្ណោះ ទទួលបានការគាំទ្រ​និងទទួលបានអាសនៈនៅ​ក្នុង​សភាគឺគណបក្សប្រជាជនកម្ពុជាទទួលបាន ១២០អាសនៈ និងគណបក្សហ៊្វុនស៊ិនប៉ិច ទទួល​បាន ៥អាសនៈ៕AKP