គណៈរដ្ឋមន្ត្រីថ្មីដែលដឹកនាំដោយឯកឧត្តមនាយករដ្ឋមន្ត្រី ហ៊ុន ម៉ាណែត នឹងដឹកនាំកិច្ចប្រជុំពេញអង្គដំបូងនៅថ្ងៃទី២៤ ខែសីហា ឆ្នាំ២០២៣ខាងមុខ ដើម្បីផ្សព្វផ្សាយពីគោលនយោបាយរបស់រដ្ឋាភិបាលថ្មី។ក៏ប៉ុន្តែ២ថ្ងៃមុនកិច្ចប្រជុំនេះ គណៈរដ្ឋមន្ត្រីថ្មីបានបែងចែកការងារនិងការទទួលខុសត្រូវរបស់សមាជិករដ្ឋាភិបាល ដែលក្នុងនោះមានឧបនាយករដ្ឋមន្ត្រី និងទេសរដ្ឋមន្ត្រី ខណៈរដ្ឋមន្ត្រីមានក្រសួងទទួលខុសត្រូវរៀងៗខ្លួន។
 |
|
មុននឹងឈានចូលដល់កិច្ចប្រជុំពេញអង្គជាលើកដំបូងនៅថ្ងៃសុក្រខាងមុខឯកឧត្តមនាយករដ្ឋមន្ត្រី ហ៊ុន ម៉ាណែត បានចេញសេចក្តីសម្រេចកំណត់របៀបរបបការងារ និងបែងចែកភារកិច្ចរបស់ថ្នាក់ដឹកនាំរដ្ឋាភិបាលជាមុន ដោយលោក នេត សាវឿន ដែលជាឧបនាយករដ្ឋមន្ត្រីត្រូវទទួលបន្ទុកជានាយករដ្ឋមន្ត្រីស្តីទីពេលអវត្តមាននាយករដ្ឋមន្ត្រីនិងជួយនាយករដ្ឋមន្ត្រីលើវិស័យសន្តិសុខជាតិ។ចំណុចនេះ ត្រូវគេនឹកឃើញថាសម្តេចស ខេងបានក្លាយជានាយករដ្ឋមន្ត្រីស្តីទីនៅពេលអវត្តមាននាយករដ្ឋមន្ត្រីនៅក្នុងអាណត្តិចាស់។ បន្ថែមពីនេះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី ក៏ត្រូវទទួលបន្ទុកជានាយករដ្ឋមន្ត្រីស្តីទីដែរ នៅពេលនាយករដ្ឋមន្ត្រី និងលោក នេត សាវឿន អវត្តមាន។នេះបើតាមសេចក្តីសម្រេចដែលចុះហត្ថលេខាដោយឯកឧត្តមហ៊ុន ម៉ាណែត។លោកឧបនាយករដ្ឋមន្ត្រី ស៊ុន ចាន់ថុល ដែលមិនមានកាន់ក្រសួងនោះ ក៏ត្រូវមានតួនាទីសំខាន់ជួយនាយករដ្ឋមន្ត្រីលើផ្នែកវិនិយោគ ទទួលបន្ទុកជាសហប្រធានខាងភាគីកម្ពុជានៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន និងការងារមួយចំនួនទៀត។ ក្រៅពីនេះ ឧបនាយករដ្ឋមន្ត្រីចំនួន៧រូបទៀត មានលោក ហង់ជួន ណារ៉ុន លោក សាយ សំអាល់ លោក ស សុខា លោក ទៀ សីហា លោក កើត រិទ្ធ លោក សុខ ចិន្តាសោភា និងលោក វង្សី វិស្សុត ក៏មានភារកិច្ចជួយនាយករដ្ឋមន្ត្រីតាមវិស័យ ដែលឧបនាយករដ្ឋមន្ត្រីទាំងអស់នេះ ដឹកនាំក្រសួងរៀងៗខ្លួន។សេចក្តីសម្រេចក៏បានបញ្ជាក់ដែរថាឧបនាយករដ្ឋមន្ត្រីមួយរូបៗ អាចមានទីប្រឹក្សា៤រូប និងជំនួយការ៥រូប ដែលមានឋានៈស្មើចាប់ពីរដ្ឋលេខាធិការរហូតដល់ប្រធាននាយកដ្ឋាន។ដោយឡែក ចំពោះទេសរដ្ឋមន្ត្រី២១រូបវិញ រដ្ឋមន្រ្តីជាន់ខ្ពស់ទាំងអស់នេះ ក៏ត្រូវមានភារកិច្ចជួយដល់កិច្ចការនាយករដ្ឋមន្ត្រីលើវិស័យផ្សេងៗគ្នា ទៅតាមជំនាញ និងបទពិសោធន៍ដែលធ្លាប់ធ្វើកន្លងមក៕RFI
/unnamed.png
Post a Comment